" مراجعة مادة الأحياء "
- شلون ممكن اراجع مادة الأحياء !؟
1⃣ تجي للفصل #الأول (40-45 درجة) : تقراه على مصدرك المتعود عليه وما تغيرو ابدًا ، تجي كل موضوع تراجعو بعد ما تكمل ، تختبر نفسك بي بالأسئلة الوزارية الخاصة بي مباشرةً ثم يلا تنتقل للموضوع إللي بعدو ، وهكذا ....
2⃣ تجي للفصل #الثاني (40-45 درجة): نفس حالة الفصل الأول.
3⃣ تجي للفصل #الثالث (50-55 درجة): ايضًا تراجع كل موضوع ثم تختبر نفسك بوزاريات الموضوع وهكذا.
#ملاحظات_مهمة_جداً |
▪️ ضبط للاسئلة الوزارية للمادة من 2013 يضمنلك على الأقل 120 درجة بالامتحان من اصل (145-150).
▪️ ضبط لوزاريات المادة من 2015 يضمنلك 90-95 درجة بالامتحان الوزاري.
#اساسيات |
* دير بالك تغير مصادرك اللي معتمد عليهم دير بالك ، افتهمت ؟ تثبت عليهم وما تتحرك عليهم.
* تقرا الرسومات كل فصل بفصلو خوش ؟ لا تجمعهم سوا ابد ، وقبل الامتحان تسويلك عليهم مراجعة سريعة.
* تركز كل التركيز على الاسئلة الوزارية لان حتتكرر بشكل فظيع بالامتحان مالكم (بنسبة ٩٧٪).
* تركز على اسئلة #التلفزيون_التربوي لأنه مهمة وجا منها تعليل بأسئلة الدور الثاني التكميلي وحتى الجواب النموذجي نفسو بالضبط كان ف أعتقد من المهم الإطلاع عليها.
* ركز على المقارنات الوزارية ومقارنات التلفزيون التربوي جدًا واحفظهم بشكل جداول ، ولا تجاوب المقارنات بشكل شرح ابد لأنه ينقصونك واضح ؟ ف على شكل جداول.
* تطلع على ملاحظات مركز الفحص الوزارية للمادة لأنه مهمة كلش وتتعلم منها كيف يكون جوابك نموذجي.
#صيغ_ثابتة
▪️ أسئلة حتشوفها بكل نسخة وزارية للأحياء |
1⃣ عرف ( ١٢ درجة).
2⃣ علل (١٢ درجة).
3⃣ قارن أو ما الفرق (١٢ درجات).
4⃣ أرسم مع التأشير ( ١٢-١٦ درجة فرعين).
5⃣ املأ الفراغات ( ٨ درجات).
• هاي 5 أنماط اسئلة ثابتة بالوزاري ما تتغير ولا تتبدل يجي منها 50 درجة ثابتة.
▪️ اسئلة متغيرة وتجي أغلب النسخ الوزارية |
1⃣ مانوع النسيج (٨ درجات).
2⃣ في أي طور او دور ( ٨ درجات).
3⃣ ماموقع ( ٨ درجات).
4⃣ ما وظيفة (٨ درجات).
5⃣ ما المجموعة الكرموسومية ( ٨ درجات).
6⃣ ما منشأ ( ٨ درجات).
7⃣ من المسؤول عن (٨ درجات).
8⃣ اعطِ مثال واحد ( ٨ درجات).
9⃣ عدد مميزات (٦-٨ درجات).
▪️ عندك اسئلة عامة أخرى متفرقة.
#الرسومات |
• ماتكدر تترك الرسومات أبدًا لأنه هم الأكثر أهمية بالمادة ، يجي عليهم فرعين متفرقين بالأسئلة ، يعني لازم تجاوب على الأقل فرع إذا تترك سؤال ... عليهم ١٢-١٦ درجة بالوزاري ف أنتبه.
▪️ شنو هم أهم الرسومات #المهمة ؟!
- أهم الرسومات هي الرسومات الوزارية.
#سؤال : سالمنا تنصحنا بس نقرا الرسومات الوزارية ؟!
• صراحة لا ، لأنه منهجكم مقلص ، ممكن تجيكم رسومات مو جاية أبد بالوزاري سابقًا مثل النسيج الشحمي او الشبكي ف حرامات ممكن تضيع درجتك وتخسر الـ ١٠٠ إذا طموحك ١٠٠.
#معقولة |
• طريقة تصحيح سؤال الرسم تكون ك الآتي :
▪️ نصف الدرجة على شكل الرسم.
▪️ النصف الآخر على تأشيرات الرسم.
مثال | إذا كان الرسم من ٨ درجات ف ٤ على الشكل و٤ على التأشيرات.
والرسم مو الا نموذجي بس يكون واضح.