الموازي | الدراسة الموازية وآلية التقديم والقبول في جامعات العراق
#الموازي ||
هواي رسائل دتوصل على #الموازي ؟
وشنو هو ؟ وشلون وشوكت اقدم ؟
⭕️ تعريف الموازي ⭕️
بصورة واضحه تشتري درجات من الوزارة 😅
يعني مثلاً صيدلة الموصل قبلت 95.6 وانت معدلك 94 بهلحالة تقدم موازي وتنقبل صيدلة موصل
⭕️ درجات الموازي ⭕️
⏺ موازي الطب //
اذا جنت مقدم موازي على
( طب عام ، طب اسنان ، صيدلة ) ينطوك درجتين فوك معدلك فقط 👌
مثلاً معدلك 97 وقدمت موازي على طب المستنصرية فمعدلك يصير 99
⏺ موازي الهندسة
ينطوك 3 درجات فوك معدلك
مثلا معدلك 92 وقدمت موازي هندسة ينطوك فوكاه 3 درجات فيصير 95
⏺موازي العلوم والتمريض والتقنيات الصحية والطبية وباقي الاقسام العلمية ينطوك 4 درجات
مثلاً معدلك 80 وقدمت موازي علوم ينطوك اربع درجات فوك معدلك وتصير 84
⏺ موازي المعاهد ينطوك 5 درجات
مثلاً اذا معدلك 75 وقدمت موازي على معهد ينطوك 5 درجات ويصير معدلك 80
⭕️ دوام الموازي ⭕️
دوام صباحي حالك حال بقية الطلاب المقبولين مركزي ماكو اي فرق بينك وبينهم غير انك تدفع فلوس وتطلع عليك سمعة طاك 😅👌
⭕️ تقديم الموازي ⭕️
بعد القبول المركزي بايام معدودة ينفتح التقديم
⭕️ آلية التقديم والقبول ⭕️
من ينفتح التقديم على الموازي نبلغكم وترحون لاقرب جامعة عليكم وتتبعون اجراءات معينة تفعلون بيها رقمكم الامتحاني
و وراها تقدم تقديم الكتروني والك حق تملي 10 خيارات فقط وتطلع الك الخيارات الي تقبل معدلك بعد الاضافة
مثلا انت جنت 85 واكو معاهد ما تقبلك فمن تروح للجامعة وتريد تقدم موازي على المعاهد معدلك حيصير 90 ويطلعن الك المعاهد الي تقبل معدل 90 فمن تقدم تملي 10 خيارات وخلي يكونن بالتسلسل حسب رغبتك
⭕️ نسبة الموازي في الكليات والمعاهد ⭕️
كل 100 مقعد ( 100 طالب ) بالمعهد او الكلية تكون حصة او عدد طلاب الموازي بيهم 15 طالب بس هاي ال 15 طالب تتوزع 5 طلاب من طلاب السنة الماضية و 10 طلاب من طلاب السنة نفسها
يعني 5% لطلاب العام السابق
و 10% لطلاب السنة نفسها
#توضيح_اكثر
انت تخرجت بسنة 2017 / 2018 وقدمت وطلع قبولك كلية معينة وداومت و وراها ضجت وتريد تقدم على كلية ومتقبلك فهنا الك حق تقدم موازي بس كل 100 مقعد الكم حصة 5 مقاعد فقط باعتباركم داومتو سنة كاملة او اجلتو سنة يلا قدمتو بالسنة الوراها لان ما لحكتم تقدمون بسنتكم
اما طلاب السنة نفسها مثلاً هسة انتو حتقدمون ويطلع قبولكم فد كلية معينة ومداومتوا بنفس الكليى ما عجبكم القبول وردتوا تقدمون موازي فعدد مقاعدكم 10% يعني من كل 100 طالب الكم نسبة 10 طلاب لان انتو قدمتو بنفس السنة لا اجلتو و لا داومتو بقبولكم المركزي
مباشرةً ما عجبكم القبول المركزي قدمتوا موازي
⭕️ الية قبول الطلاب واحتمالية قبولك ⭕️
شلون اعرف اني راح انقبل او لا ؟
هنا محد يعرف لان تعتمد على المعدلات
خل ناخذ مثال //
جامعة البصرة / كلية الطب تقبل 300 طالب من ضمن ذول ال 300 اكو 30 طالب موازي قدمو بنفس السنة و 15 طالب موازي ( طلاب السنة الفاتت )
انتو ال 30 طالب شلون حتتنافسون بيناتكم ومنو راح يحصل مقعد ؟
زين الكلية تحتاح 30 طالب والمقدمين 80 طالب هنا الكلية شحتسوي ؟
حتجمع ال 80 طالب كلهم وتختار اعلى 30 طالب وتقبلهم بالكلية
ونفس الشي ال 15 طالب من طلاب السنة الفاتت الكلية تريد بس 15 والمقدمين 40 مثلاً
فالكلية تاخذ اعلى معدلات 15 طالب وتقبلهم بالكلية
فقبولك محد يعرف اذا تنقبل لو لا لان محد يعرف المعدلات المقدمه شنو وشنو
⭕️ اجور الموازي ⭕️
الاجور تختلف باختلاف الكليات وللملية الصلاحية بان تخفضها
مثلا
طب عام 12 مليون
طب اسنان 10 ملايين
صيدلة 8 ونص مليون
وباقي الاسعار تعرفوها من ينفتح الموازي وتقدمون
والاجور كل سنة تدفع مو بس سنة وحدة وتكدر تتفق وية كليتك ويسون الك القسط قسمين مثلا قبل نص السنة تدفع نص و ورة نص السنة تدفع نص
⏺ اجور القسم الداخلي لطلبة الموازي تكون اضعاف من الاجور للطلبة المقبولين مركزياً