مصطلحات جديدة ظهرت في معارض سيارات العراق بعد 2003 ..وطبعا هاي المصطلحات حيرت العلماء. في جميع انحاء العالم 🌎
1. مصبوغة عام جمالية.. هاي معناها السيارة بس ربك اليعلم شصاير بيهة .
2. جماعة السبير المقدس عبالك السيارة تصير كخة اذا نازل سبيرهة (دنقرضوا لخاطر جرجف الكعبة ).
3. ضربة شبر ..ادري مضروبة راجدي قابل.. الظاهر هاي وحدة قياس الضربة بالعراق ..
4. مكفولة من كل شي عدا صبغ وضربة بفلان مكان ! .. بعد وين الكفالة بالموضوع. ؟
5. سيارة 🚗 مال دكتورة .. وماكو رصيف لو حايط اذا ما ماخذه منه مراد..
6. بدون ايرباك ! هاي مقدسة بالله ..مع العلم ضربات بسيطة و وطاك ايرباك هاي شلون ما طاك ؟ ..سوبهان الله..
7 .. جماعة الشكل القديم انتو وحدكم مرض ويرادلكم منشور بس عليكم لان ما ادري انتو بعدكم بيا سنة عايشين 😂. يا الهي كم لبثنا ..
8. سيارة 🚗 مال بيت 🏠.. ادري هي تراكسوت لو گلبية رحمة لگصايب حبوبتك ..قابل تفتر بيهة بالبيت لو سيارتك الثانية مال شارع ..النظيفة ترة مبينة حمبي..
9. سلايت طكتين ..هسة طكتين لو خمس طكات مو مهم ..! بس كول فتحة بالقمارة لو سلايد روف وخلص.
10. فول ماعدا كذا وكذا وكذا.. بعد وين الفول بالموضوع !
11. مسجل سيدي 📀 واواكس.. ترة حتى بالسايبة موجودات والله .
12. واحد على واحد 1/1… هاي العبارة الي حيرت حتى علماء اللغة.. محد يعرف شنو معناها ومنين اجيت هيج فجأة طشت..
13. سبعة كير وي البگ. عود فيكة يزيد عدد النمر ..ادري قابل راح اطي بك ورة السادس ؟
14. دگشن عالي.. لحد الان محد فسرلي هاي الكلمة ..يجي ويعرض سيارته ويكتب دكشن عالي ومن تساله شنو هذا و وين صاير يضل صافن لان. هيج مجرد تلزيك مواصفات عود.
15. سيارة 🚗 مال 💰 جناي ..هنا خلي ابالك الاخ يريد يفلق بالسعر علساس الرغاب والجناي يدفع بلا وجع راس..
16. خيط تبخير.. خل ابالك محرك كايم..
17. تخم تاير ابو الخطة وباتري جديد..! يابة ترة ذني مو مواصفات رحمة لبيبيتك..
18. مرشوشة دعامياتهة اثر شخوط !! يعني بربك تعقلهة هاي السالفة ؟ خو كول انضربن واتصلحن وانصبغن وفيماالاه..
19. الزيرو لو اخت الزيرو… وهي ماشية 10 الاف وفوك.. تدري يعني شكد.. يعني ماشية مسافة العراق كله 10 مرات.. بعد وين الزيرو بالموضوع؟ ..
20. جماعة الارقام الشمالية خو انتو اسعاركم اغلى من بغداد رافعين راية وحدكم.
21. جماعة السعر عالخاص ترة والله مابيناتنا عمل مخابرات وسري وشخصي نزل سعر سيارتك باليرضي الله واليكسر بسعرك هينه ورزله محد يعاتبك والله.. هسة اني اكعد اراسلك وانتظر حظرتك عود تنتبه للرسائل وتطخ عندك تجاوبني لو لا ها.؟والله مابعت سيارة 🚗 اذا مو انزل السعر قفل وياها والماعاجبه براحته.
22. جماعة السيارات القديمة موديلات الثمانينات والتسعينات متعجبين انتو ..عمي شنو هاي الشدات باسعاركم. الله وكيلك اخذ سيارة 🚗.حديثة وارتاح وما افكر بعطل عمي انتو حتى قطع غيار بعد ماكو لسياراتكم وان وجدت باسعار غالية .. حتى سياراتكم انقرضن ..
23. جماعة الكروبات انتو بالله بغير عالم غناء وحفلات وطرب اصيل والاسعار فوك السوك ب20 ورقة اقل شي..كل كروب مختص بسيارة معينة عنده بس هي وبس ..ونصيحة لاتشتري سيارة 🚗 من اي كروب خاص بيهة لان احتمال يصير بيك صرع وشلل نصفي من الاسعار المريخية .. برنامج ذة فويس مختصر مفيد..
24. الحبربشية والقفاصة وال56 ..هذولة من يبيع يسوي سيارته نازله من السماء ومذكورة بالقران واذا يريد يشتري لو معروضه بربع دينار يكلك 2 بربع تبيع ..هذا النوع من المخلوقات دواه ال45 ابو الطبعة القديم..
25. موديل 99 بس مسجله 87 هاي شلون رهمتوهة ما ادري ..
عموما الحجي هواي وهذني الي اذكرهن