مرحبا بكم على موقعنا | أتمنى أن يعجبكم محتواه | فقط ادعمونا بالانضمام الى الموقع | لتحفيزنا على تقديم المزيد. ×

كوري بيوتي Goree

شرح "المضارع التام البسيط" في اللغة الانكليزية للصف السادس الاعدادي - سيف شاكر


شرح "المضارع التام" في اللغة الانكليزية للصف السادس الاعدادي - سيف شاكر

اعرفكم ب 
😐
👕
👖

بالشاب اسمه مضارع تام ..هذا الشاب مثابر وطموح 💪
يدرس بالجامعه حاليا 😌..واختصاصه هو 
وصف الاحداث الي تصير بالماضي وتستمر نتيجتهة للحاظر 😁 

عبالكم اختصاصه صعب؟؟ لا هسه افهمكم 

هذا الاختصاص فتحو جديد بالجامعه  يدرسون بي الحدث من يصير بالماضي ويستمر للحاظر .. بس هو يركز ع النتيجه اكثر من الحدث ..

اكلك ابو شباب مضارع تام انطي للشباب مثال ع اختصاصك ..

صدك جذب تدلل ..

واحد ضيع مفاتيحه بالماضي ولحد الان مضيعهن ..ف بالتالي النتيجه بالحاظر شنو؟؟ 

ماعنده مافاتيح ...

مثال ثاني ..

طبيت لصاحبك كلتله شنو هاي شو الغرفه متغيره ..كلك اي صبغتهة 

النتيجه الغرفه مصبوغه حاليا مايهمني يمته صبغهة مالي دخل يمته كمل اهم شي النتيجه ..
....

من افضل اصدقاء هذا الشاب ثنين 
Has , have

ودائما يتعاملون ويه الفعل بالتصريف الثالث .طاكين كله دولارات خالي .. 😌😌

الخلاصه ..

شوفو ادري هذا الزمن شويه يرادله تركيز بس فيكته بس تفهمون عن شنو يحجي راح تفهمو للابد 
...
زمن المضارع التام البسيط .زمن يسولف عن احداث صارت بالماضي واستمرت للحاظر او انتهت قبل فتره التكلم بثواني ..بس اهم شي يركز علي هو النتيجه مالت الحدث 
..
هذا الزمن استخدمه لوصف شغلات صارت قبل شويه وبدون تحديد فتره معينه يعني مثلا اكلك كبل شويه شربت ماي مو عطشان 
..
القاعده العامه لهذا الزمن 
S+has,have+p.p. 

Sفاعل 
Hasللمفرد ثابته 
Haveللجمع ثابته 
p.p تصريف ثالث للفعل 
...
I have lost my key 
يكول اني ضيعت مفاتيحي ..يمته مايهمني ..بس الي يهمني هو بدون مفاتيح هسه 
She has passed the examination 
هي اجتازت الاختبار ..يمته امتحنت مايهمني ..الي يهمني هي ناجحه ..
Ali has cleaned the room 
علي نظف الغرفه يمته مايهمني بس الغرفه هسه نضيفه


شباب تره الافعال القياسيه ينضافلهة ed بالتصريف الثالث 
والشاذه تتحول

هسه راح نفصخه اني وياكم ادري ماوصللكم شرح الفوك 😭 ..هسه راح نجي لاستعمالاته وين يستعمل ..شلون يستعمل كلهن نفس شي

شوفو اله استعمالين ..
١-احجي عن شغله توهة صارت ..نوكل عليهة كبل شويه ماصارلي هواي . قبل دقايق 

٢-شغله صارت بالماضي بدون ماحدد شوكت بالماضي

-------------------------------------------------------------

١- حدث كبل شويه صار ..

مثل اهلك يصيحوك يكلولك يابه تره العشه صار انزل تعشه ..تكللهم ماشتهي كبل شويه اكلت 

I have eaten.

او هسه اني توني طالع من المطعم ماكل وشبعان مشيت شويه لاكاني صاحبي ها سيوفي شلونك ..حبيبي اهلا وسهلا مشتاقين..تعال عازمك ..صدك يله 😁

عشت اللقطه ..

لا اكله لا والله توني اكلت .كبل شويه اكلت ..

I have eaten. 

من تكعد خطار واحد يجيبلك ماي تشرب ..ف اكو هذا الزعطوط الخبيث الي يلزكلك اله تشرب ماي 

هو انت شارب وهذا يلطشلك ..بالعين والاغاتي تكله شكرا حبيبي توني شربت 

I have drunk water. 

اخر شي مايروح تلطشه جلاق تلزكه بالباب ..يبطل بعد مايجيك 😐


سؤال الكتاب هذا 
Would you like a cup of coffee? 
No, thanks I have just had one..


كله تريد تشرب كهوة 
كله لا توني شربت 

Just : اداة من ادواة المضارع تام نجيهة بعدين

--------------------------------------

٢-شغله صارت بالماضي بس مانحدد شوكت 

يعني ماهتم لزمن وقوع الحدث الي يهمني هو النتيجه ..

Wow, your car looks so cool.
Thank you i have changed the color 

كله سيارتك طالعه حلوة وصاكه 
كله اي غيرت لونهة 

يمته غيره مايهمني 
الي يهمني نتيجه 

سياره متغير لونهة وحلوة

ننطلق للورا لو اكو شي تردون نعيده😐

عدنه 
Just,never,ever,already,yet

Just 👇👇

شنو معناتهة 🤔
معناتهة گبل شويه 

مكانهة وين؟ مكانهة يصير بين 👇
S👉have,has👉just👉p.p 

مثال 
The cat has just caught a bird 

يگول القطه 😺 كمشتلهة طير كبل شويه

Never

معناهة ولا مره (ابدا)✋

مكانهة 👇
S+have,has👉never👈+p.p

هاي تستعمل بالجمله المثبته بس تنطي معنة النفي يعني شلون🤔

I have never cheated in an exam 

يكلك اني ابدا ماغاش بالامتحان😂😂 

ملاحزه 😁 مايصير never و not تجي سوة لان هي نفي 
ميصير تكول ❌
I haven't never cheated in an exam

Ever
نفس معنى never👍 بس هاي تستعمل ويه سؤال ❓

Have you ever failed a class? 

شلون نكول ابد ماراسب ؟ 
😳😳

مكانهة نفس مكان never 👍

Already 

معناهة اقرب من ماتتصور هيج معنى تجي😕👌

يعني فد شي صار بسرعه وبوقت قريب كلش 🌚

مثلا يكله اكلك هاي شنو ذوله حجزو مكان كبلنه 😳😳 شبسرعه😭

They have already booked their tickets. 

ذوله حجزو تذاكرهم 

المشكله ترجمه هيج فد مضبوطه الهة مجاي تجي بحلكي 😭😝

مكانهة نفس البقيه☝️☝️

Yet

هاي المسكينه مابيهم 😢

ليش مسكينه لان دائما تجي بنهاية الجمله😭😭

S+have,has+p.p.+yet

يعني سواء اكو تكمله وره الفعل او لا وين ماتنتهي جمله خليهة بالاخير 🙄

معناهة لحد الان 😆 

استعملهة بخير من الله مكانات استعملهة بالجمل المنفيه ..لاحظ عزيزي المواتن استعملهة بالجمله المنفية مو معناهة هي نفي مثل never 🤗🤗

I haven't packed my bag yet.👈

شوف اكو not بالجمله 

بعد استعملهة بالسؤال🤔🤔

Have you bought your shirt yet?

يكلك اشتريت تشيرتك لو لحد الان مامشتري هيج معنى الجمله😉



بالمناسبة نسينة شغلة 

السؤال 
have,has+s+p.p ?

سواء كدامهة ادوات سؤال او لا هاي الصيغة ثابتة 

اما النفي 

ضيف not  لل have ,has

راح انطيكم كل مرة انواع مختلفة من الاسئلة تشمل الموضوع كلة .. ف لاتخافون الي يكولون شلون تجي الاسئلة راح نجيبهن كلهن ولو احنة لو اهل الوزاري 😌😌


Put the verbs into the correct form (present perfect simple).

I (not / work)  today.
We (buy)  a new lamp.
We (not / plan)  our holiday yet.
Where (be / you) ?
He (write)  five letters.
She (not / see)  him for a long time.
(be / you)  at school?
School (not / start)  yet.
(speak / he)  to his boss?
No, he (have/ not)  the time yet.



اسئلة اخرى

Fill in the blanks using ever, never, just, already and yet.


1. Have you —--- been in America?

2. Do you hear the noise? The train has----  arrived.

3. No. Your cousin hasn't come to the party------- .

4. Can you open the door? Oh, it is---—  open.

5. Your daughter has----  returned home. You don't have to worry anymore.

6. Haven't you finished your food —---? No, I am still eating mom.

7. I am a very lucky person. I have —--- had nightmares.

8. Are you going to meet me at the shop? Yes, I am  —---there.

9. I have---—  realized how beautiful you are.

10. Would you like to have dinner with us? No thanks, I have----- had dinner.

11. Have you---—  seen such a big ant?



انطلقووووو .. اقرة شوية واجي اشوف اجاباتكم .. ع راحتكم لاتستعجلون 
لاتعيدون الجملة كلهة حتى  لو بس الاجابة 

ابطال ابطال كلكم والله .. عاشت اديكم ع الاجوبة الخرافية 😍😍 .. نوب الي يجاوب جواب صحيح اخذ اجابتة وانشرهة ك حل 

الاجووووبة

1. ever
2. just
3. yet
4. already
5. just
6. yet
7. never
8. already
9. just
10. already
11. ever

..
استعدو عدنة شرح راح يجي

الفرق بين just , already 

يعتمد ع المعنى بس خلي نشرحهة 👇👇

Just تنطي معنى 
Exactly, very recently 
تحديدا او منذ فتره وجيزه (كبل شويه،هستوة) 👉🙃

She has just arrived ( وصلت كبل شويه) 

الجمله الي حاطيهة مثل جمله رقم✌️٢ 

كله تسمع هاي الضجه؟ شجاوبه كله اي القطار هستوة تحرك ..احتمال القطار🚄 طالع وسمع طكطكه مالت العرباين الي بالنص 🚞🚋..اكو قطار بعد بي عرباين😑😑

Already: تنطي معنا التعجب دائما😳😳

She has already left 
احنه متوقعيهة تمشي صح بس مو بهل السرعه 😳 بويه ماطولت 😳😳


الفرق بين "المضارع التام البسيط" و"الماضي البسيط" في اللغة الانكليزية للصف السادس الاعدادي

الفرق بين المضارع التام البسيط 
Present perfect simple 
والماضي البسيط 
Past simple 
..

للتذكير بالقاعده مالت كل زمن📋
S+has,have+p.p 
للمضارع التام 
S+v-ed
للماضي البسيط ✔️

شوفو هنه الزمنين احداثهن صارن بالماضي💤
بس المضارع التام يستمر الحدث او نتيجته🏃

بينما الماضي البسيط يصير الحدث ويخلص بالماضي ماله اي ربط بالحاظر 🚫
...
🔸I have known Julie for ten years 

🔹I knew Julie for ten years


اول جمله بالمضارع التام  .تكول اني اعرف جولي صار عشر سنوات .ولحد الان هي صديقتي او حبيبتي 😍فديت جولي اني😎
يعني لحد الان هي وياي 

بينما الجمله ✌️الثانيه 
تكول اني عرفت جولي لعشر سنوات حاليا هي ماهية يجوز ربك اخذهة😐 يجوز  وكعت من سطح🤗 كلشي يصير دنيا هاي 🙄
المهم هسه اني جولي مو يمي 




المضارع تام من يحجي عن حدث ماينطي موعد محدد اله بينما الماضي لازم يكلك فد فتره صار بيهة هذا الحدث ..يعني شلون🤔
..
🔸I have seen this movie 

🔹I saw this movie yesterday 


باعو الفرق ⤵️

الجمله الاولى كال اني شايف هذا الفلم ..بس ماكلي شوكت ودام استعمل المضارع التام اني مايهمني اعرف شوكت ✖️✖️

بينما الثانيه كل شفت الفلم هذا امس شوفو امس يعني حدد فتره معينه او توقيت معين🕔


بينما لو كايل 
I saw this movie 

وسكت 😶

الي يسمع يبقه منتظر يكله شوكت 

Last week, tow hours ago , last month,.....الخ 


واضحه هاي ؟؟ 🤔🤔

بعد المن استعمله شطلعت هاي😭😭

المضارع التام يحجي عن حدث هذا الحدث صار بفتره او بوقت وهذا الوقت بعده ماخالص😳 
..
بينما الماضي لا عكسه ..لصته مو 😁

تعالو للمثال 


لحظه ✋ انزع حذائك ياله طب 🚪


🔸I have seen Ahmed this week 

🔹I saw Ahmed last week 


الاولى تكول اني شفت احمد هذا الاسبوع👦 من كلمه هذا الاسبوع معناهة احنه بعدنه بالاسبوع ماخلص ❌
يجوز شفته ثلاثاء واني جاي احجي الاربعاء 👀

اما الثانيه ف تكول شفت احمد شوكت؟؟؟ هاا؟؟  عفييييييه💃💃

الاسبوع الفات يعني خلص الاسبوع وراح 🙆


ها؟😠

شرح استخدام "Since & For" في المضارع التام البسيط في اللغة الانكليزية للسادس الاعدادي

Since 
For 

اكثر شي احبه بالانكليزي وبسيط 😍

ذني ثنين يستعملوهن ويه المضارع التام ..

تذكرون احنه كلنه انو مايحدد فتره زمنيه 😐

سووله تحديث وضافوله ذني ثنين وصار اذا يريد يحدد فتره زمنيه لازم يخلي ذني الادوات😁


Since+الفتره
For+الفتره 


بس هاااا🚫🚫🚫 

كلمن واستعمالهة ♨️ 

يعني شلون؟اكلك لاتصعبهة علينه😣 


لا لا بسيطه شوفو 😌 

Since 

تستعمل ويه الفتره المحدده بالماضي 🔙

مثل اكول .منذ الولاده .منذ سنه 1990 يعني احدد نقطه معينه بالماضي 

Since 3 o'clock 
Since born منذ الولاده
Since 3 years old منذ عمر الثالثه 
Since 1990  

😶



For 

فتره غير محدده بالماضي 

For ten years 

لمده عشر سنوات ..اني ماعرف شوكت بدت هاي العشر سنوات بس اعرف المده عشر سنوات 😬 

For long time 

لزمن طويييل طوييييل بوو👻 

يعني الفرق انو since زمنهة محدد و for غير محدد

الي مافهمو ركزو هنا 


٦---------------------٥

هذا الخط هو حدث صار بالماضي استمر مثلا من ساعه ب ٥ وانتهة ب ٦


يعني ساعه وحده ☝️ مو صحيح؟ 

اذا اريد استعمل since لازم شكول 

Since 5 am 🕔, since 6  am o'clock 🕕

يعني حددت او  
Since 5:30 am
Since 5 : 15 am 

المهم الفتره محدده ↖️ بالخمسه الفجر😐

بينما اذا اريد استعمل for 

اكول 
For one hour 1⃣

يعني ماحددت احتمال هاي الساعه من 5 الى ٦ الفجر او من ٥ الى ٦ العصر 😁😁


صار واضح؟ 🤔


مجموعة امثلة حتى تفهمون اكثر استعمال since



وهاي for

اسئلة

Decide whether you have to use “since” or “for”.

1-I have been waiting —---4 o’clock.
2-Sue has only been waiting —--- 20 minutes.
3-Tim and Tina have been learning English —---— six years.
4-Fred and Frida have been learning French —------ 1998.
5-Joe and Josephine have been going out together —---- Valentine’s Day.
6-I haven’t been on holiday —----last July.
7-Mary has been saving her money —---- many years.
8-I haven’t eaten anything —---- breakfast.
9-You have been watching TV —--- hours.
10-We have been living here —----2 months.



راح ادرج وياكم من اسهل امتحان للصعب .. حلو حتى لو خطا المهم حل 

Q1\ Fill the gaps with 'have' or 'has'.

I  —--- answered the question.
She —---  opened the window.
They —---  called us.
You —---  carried a box.
It —----  rained a lot.
We------   washed the car.
He —----  closed the window.
Jenny  —---— locked the door.
The girls —---—  visited the museum.
John and Sophie  —---- helped in the garden.


بسيط اعتقد ماكو هيج  بساطة بس نريد نراجع الموضوع كلة 

الحــــــــــــل



-----------------------------------------

Complete the table in present perfect simple.



مو تنسون علامة الاستفهام اعتبر السؤال كلة غلط ترة اذا نسيتوهة

الحـــــــــل

كلكم ابطال .. كل جوابكم صحيح  

1-He hasn't written a litter / Has he written a litter? 

2- They have stopped/ Have they stopped?  

3- We have danced / We haven't danced

4-She hasn't worked/ Has she worked? 

5-Andy has slept / Has Andy slept?

-----------------------------

Write the participle forms of the following verbs

make → 
drink → 
catch → 
have → 
sit → 
go → 
sing → 
be → 
buy → 
do → 
shut → 
spend → 
give → 
teach → 
sell → 

شكد ماتكدرون اعتمدو ع نفسكم .. 


الحـــــــل

go → gone
sing → sung
be → been 
buy → bought
do → done
shut → shut
spend → spent
give → given
teach → taught
sell → sold
make → made
drink → drunk
catch → caught
have → had
sit → sat

--------------------------

Put the verbs into the correct tense (simple past or present perfect simple).

A: (you / buy)  the tickets for our journey yet?
B: Yes, I (go)  to the station yesterday and (buy)  the tickets.
A: What time (you / go)  there?
B: I (take)  a friend to the station in the morning. His train (leave)  at 9:45.
A: (you / pack)  your bags yet?
B: Of course. And I (ask / already)  my neighbour to empty my letter box. What about you?
B: I (pack)  my bags two days ago.


ع كيييييييييييييييييفكم .. 

الحـــــــــــل



A: What time (you / go)  there? 

هواي سألو ع هاي النقطة وليش خلينة did 

 شوفو 

B: Yes, I went to the station yesterday and bought(i) the tickets.
A: What time did you go(i) there?
B: I took a friend to the station in the morning. His train left(i) at 9:45.


هذني ال 3 اسطر يحجن نفس الحادثة 

ونفس الزمن .. كلولي ليش 😱

كلتولي ليش 😥 

شوفو كلة Yes, I went to the station yesterday and bought(i) the tickets.

يعني اني رحت امس واشتريت التكت من المحطة يعني من كلمة امس الحدث صار بالماضي البسيط وانتهة وراح

بالتالي من سألة  What time did you go(i) there? 

اكيد سألة ع الروحة مالت امس 😁 يعني كلة شوكت رحت امس ؟؟ 

ف صيغة السؤال بالماضي البسيط 
did +s+vمجرد 

كلنة did  تبسط الفعل وتاخذ منة الصيغة مالت الماضي 


وصلت ؟؟

------------------------------------------------------------------

اكو شرح بسيط اريد اشرحة الكم .. ف اصفولي شوية 

هيج شوية واجيكم ع ماتصفون 😍😍

gone .. been 

راح يجيك سؤال بالوزاري نقطة من سؤال 

هذا السؤال يكلك اختار لو gone لو been 

شراح تسوين ؟؟😱😱😱😱 

تكلة ماعرف 😱😱😱

لاع 😒 

الي تسوي الاتي 

الكلمتين معناهن ذهب 👌

تمام ؟؟

بس الفرق شنو 

gone  

بيهة شكم حرف e ?? 

بيهة واحد معناهة روحة بلا ردة 

راح ومارجع 

been 

بيهة حرفين e 

واحد روحة 
والثاني ردة 


gone يعني 
راح وبعدة مارجع 

been  لا راح ورجع .. 

...

She's ___ to visit Susan. She'll be home tomorrow.

يكول هي راحت تزور سوسن مدري سوزان 

المهم بس هي راح تجي باجر 

يعني شحط ؟؟

gone لو been ?🤔🤔🤔

صدك جذب 😂😂 

بس ثنين حلوهة صح 😐 شجاكم .. 

كلنة دقروهة عدل😄

كلنة gone  راح وبعدة مارجع 😱


يعني بالجملة كايل هي رايحة تزور سوزي وباجر تجي 

يعني بالنتيجة هي رجعت لو بعدهي ؟؟

اكيد بعدهي لان باجر تجي 😕 ..

طخت ؟؟

يمعووودين اصحو شوية ..شلون ادكلكم الشاشة 👊👊 وياي هنا 

She's ___ to visit Susan. She'll be home tomorrow

بالنسبة للجزء الثاني She'll be home tomorrow ضربتو جلاق ؟😒

مو جاي يكول باجر تجي 👌 يعني بعدهي ماجاية 👇

gone  اذا رحت وبعدهي ما اجت او ما اجة 

been  اذا راح سافر لغير مكان راح لدبي 😡 يلة راح لدبي 

اخذلة يومين ورجع .. ركزززووو رجععع يعني هسة هو عد اهلة 

been 
e راح بيهة لدبي 
e رجع بيهة 

هاي كروتة 

😝😝 

بشرو ايها الجيل الواعد 😐


يلة اخر جملة بدرس اليوم

Have you ever ___ to New York? 

gone  لو been  صفنووو زين ترة حلهة بسيط والله

هسه اني شسوي 😭😭

تره والله فصختهة للقاعده تفصخ😭

يمعودين كلنه 

Been 
راح🏃ورجع🚶

يعني هسه هو من سأله انت رايح لنيويورك؟ 

يعني اذا اريد استعمل gone  ومعناهة راح ومارجع🏃 لحد الان 👀

بشرفكم زين هو ويامن جاي يحجي😭

غير ويه صديقه الي سأله😖

لا اكو يكلولي يمكن خابره لو شي 

ادري اذا خابره ليش يسأله هو بنيويورك بعد😭

او ع فرض بغير مكان مايصير يكله gone لان هو مايدري وين اصلا بيا مچان☹️

وضحت 😭

اسهل موضوع يمعودين حريمه طيرون درجه😭😭



اعداد : سيف شاكر 

رحلة التفوق في السادس

شرح "المضارع التام البسيط" في اللغة الانكليزية للصف السادس الاعدادي - سيف شاكر شرح "المضارع التام البسيط" في اللغة الانكليزية للصف السادس الاعدادي - سيف شاكر Reviewed by HamaDa Al-iraqi on 11:59 ص Rating: 5

ليست هناك تعليقات:

يتم التشغيل بواسطة Blogger.