المختصر المفيد عن معهد التدريب النفطي في البصره وكيفية التقديم والقبول فيه

المختصر المفيد عن معهد التدريب النفطي في البصره وكيفية التقديم والقبول فيه

#كل_مايخص_معهد_النفط 
السلام عليكم ورحمة الله وبركاته 
اخوان حبيت احجيلكم فد مختصر عن معهد التدريب النفطي في البصره حصرا وكيفية القبول ...
معهد نفط البصره يقبل طلاب المحافظات الجنوبيه النفطيه الي هي ( البصره /ميسان/ الناصريه ) وبعض الاستثناءات مثل #المناطق_الساخنه ...
معهد الفط  تابع لوزارة النفط يعني ما تابع لوزارة التعليم العالي ولا يمه ✋️✋️ 
التقديم اله يكون مباشر على الانترنيت من خلال موقع المعهد .. 🌹😘
موعد التقديم بعد نتائج الدور الثاني .. ويتم الاعلان عن التقديم والشروط 
في موقع المعهد 
🌹🌹🌹🌹🌹🌹🌹🌹🌹🌹🌹🌹🌹🌹
هسه نجي للمعدل وبعض الامور اوضحهن
من شروط التقديم ان لا يقل المعدل عن 75 ويكون القبول حسب المفاضله يعني الي معدله اعلى يكون قبوله مضمون اكثر 
المعهد يقبل الذكور كأغلبيه عظمى والبنات يقبلهن بس بشكل قليل جدا 
اقل معدل قبله العام الماضي 81.5 بالنسبه للذكور واابقيه خلوهم احتياط اول وثاني وثالث ومرات يصعدون من الاحتياط الاول اذا احتاجوا ومرات يستغنون عنهم مثل العام الماضي 
والبنات قبل اقل معدل 92 تقريبا 
مدة دراسة المعهد سنتين وتتخرج وتكون وزارة النفط ملزمه بتعيينك لان ما يصير تتعين بـ وزارة ثانيه 
من تقدم وتروح تسجل توقع على تعهد بعدم المطالبه بتعيين عند التخرج وهذا شي روتيني علمود ما تصير ضجه بعد التخرج  بس يبقه تعيينك مضمون لان وزارة النفط تمويلها ذاتي واحنه بلد نفطي فنحتاج الى ايدي عامله قةفيكون التعيين مضمون 
يحتوي معهد نفط البصره على 12 اختصاص موزعه على 4 اقسام والاقسام هي  
قسم النفط اذا تطلع من الاوائل بأختصاصاته تكمل هندسه نفط ❤️
وقسم الكهرباء  اذا تطلع من الاوائل بأختصاصاته تكمل هندسه كهرباء❤️
وقسم التصفيه  اذا تطلع من الاوائل بأختصاصاته تكمل هندسه كيمياويه❤️❤️
قسم الميكانيك  اذا تطلع من الاوائل بأختصاصاته تكمل هندسه ميكانيك ❤️
يوجد معهد نفط في محافظة ميسان وهو فرع من معهد نفط البصره وتابع له وهو حصري لطلاب محافظة ميسان يحتوي على 3 اختصاصات وهي (قياس وسيطره /تشغيل وسيطره / لحام غازي) 
بالمعهد اذا كنت طالب محافظات من ميسان او الناصريه او احد اقضية البصره ينطونك راتب شهري مقداره 225 الف لكل طالب شهريا 75 يسمونها جيبيه و 150 يسمونها سكن 
اما بالنسبه لطلاب مركز محافظة البصره ينطونهم جيبيه فقط اي 75 الف دينار لكل طالب شهريا 
لا توجد اقسام داخليه في المعهد يعني لازم تأجر شقه والشقق موجوده قريبه ع المعهد 
ولكن اكو قسم داخلي لا زال قيد البناء والانجاز واكو احتمال يفتحونه السنه القادمه 2017 مو اكيد بس ينفتح بأذن الله 
اذا الله راد ومن تتعين خلي يكون بعلمك راتبك كلش حلؤ ومرتب 😉😉😉😉 

اتمنه ان اكون وضحت بعض الامور بالنسبه للراغبين يرحون معهد نفط 
#الدوله_النفطيه_باقية_وتتمدد
اخوكم الطالب النفطي #التشغيلاوي_اختصاصي 
#مصطفى_قيس_الميساني

هذا مايخص معهد البصره الذي يشمل (بصره_ناصرية_عماره) 



االطلبة_الاعزاء_الجدد_القادمون_الى_معهد_التدريب_النفطي_البصرة

لكثرة الاسئلة التي تردنا حول موضوع التقديم نود ان نعلمكم بالاتي :
1-اقل معدل مطلوب هو 75  ويتم التنافس بالافضليه للمتقدمين وللفرع العلمي #حصرآ.💕🌷

2-التقديم الكتروني على الموقع الخاص بالمعهد ويكون بملئ 
استمارة خاصة بمعلومات الطالب المتقدم.💕🌹

3-يبدأ التقديم في نهاية الشهر التاسع او بداية الشهر 
العاشر..وحسب تعليمات الوزارة الخاصه بالعام الدراسي الجديد.💕💐

4-التقديم لطلبة الجنوب حصرآ ( بصرة ، عمارة ، ناصرية ).💕🌻

5-معهد نفط ميسان فرع تابع لمعهد نفط البصرة..ويكون التقديم على معهد نفط البصرة والاخير هو من ينسب طلبة ميسان #حصرا على معهد ميسان وحسب المعدلات المقبوله هناك والاختصاص .💕🌺
(يوجد ثلاث اختصاصات فقط في معهد نفط ميسان)

6-لاتعرف الحدود الدنيا للقبول في المعهد فالقبول يكون على اساس المفاضله بالمعدلات المتقدمة. 💕❤️

7_الحمد_لله تأكد افتتاح معهد نفط ذي قار للسنة الدراسية القادمة
بعد استحصال #موافقة_الوزير...ننتظر تعليمات الوزارة بهذا الشأن💕🇮🇶
8_ ان يكون الطالب حصراً خريج الدراسه الاعداديه فرع العلمي(#أحيائي_او_تطبيقي_لحد_لان_مامعلوم)للعامين الدراسيين (2015-2016 /2016-2017) .🇮🇶💕🇮🇶

#نقطة_مهمه_وهو_اكثر_سؤال_جاي_ينسأل ؟

⛧المعهد شنو يقبل السنة احيائي امتطبيقي⛧
شباب هسه حاليا بأختصار المعهد تقديمة مباشر وان شاء الله يقبل الفرعين الأحيائي والتطبيقي لكن راح يكون هنالك فرق في الاختصاصات يعني بعض الاختصاصات تقبل الاحيائي والبعض الاخر تقبل التطبيقي هذا القرار حاليا الموجود بالمعهد ونقلا عن العمادة لكن ننتظر القرار الرسمي الي راح تقره وزارة النفط او الصفحة الرسمية للمعهد او السيد المدير راح يقره ع صفحة الشخصية هذا القرار راح يكون بشهر التاسع
غير هذا الكلام ماله اَي صح بعد #ونقلاً_عن_ادارة_المعهد
                            





بعض المعلومات والشروط للقبول في معهد التفط
 1_ان يكون الطالب خريج الدراسه الاعداديه فرع العلمي(#الإحيائي_او_التطبيقي_لحد_الان_غير_معلوم) حصراً للعامين الدراسيين (2015-2016 /2016-2017) .🇮🇶

2_لا يقل المجموع الصافي للطالب المتقدم عن (525) درجه اي معدل 75%.🇮🇶

3_لا توجد استثناءات من اي شرط من شروط القبول لأي سبب كان .🇮🇶

4_يكون القبول اما حسب حاجه الشركات او حسب المعدل المطلوب .🇮🇶

5_يتم تخصيص نسبه 10%  لقبول الاناث ونسبه 5%  لقبول اوائل الصناعه حصراً.🇮🇶

6_لحد الان المعهد يقبل تطبيقي واحيائي والخبر الاكيد بشهر التاسع حسب تعليمات الوزاره .🇮🇶

7_يتم احتساب مخصصات شهرية للطلبة 75 الف دينار عراقي لسكنة مركز البصرة و225 الف دينار عراقي لسكنة الاقضية والنواحي وطلاب المحافظات .🇮🇶

#معلومة_نصيحة معهد النفط الان الخيار الافضل لكل طالب معدله من 80 الى 92لما به من تعين مركزي ومدة الدراسة به سنتين فقط وبعدها تتخرج وتستطيع بعد تخرجك ان كنت من الطلبة العشره الاوائل ان تكمل هندسه او تدرس هندسه مسائي او اهلي اذا اراد الطالب ان يكمل هندس 😍👍🏻

  #ملاحظة اي شخص اينصحك بان لاتجي للمعهد بان مابيه تعين فهذا غلطان التعين يعتمد ع طلب الشركات والمعهد ايوفره الهم التعين وان تاخر يعني شكد يتأخر سنتين التعين  احسن من اتروح كلية أتخلص اربع سنوات وتعب ونوب تكعد أدور ع شغل حر يعني المعهد😚👍🏻 

#طبعا_ملاحظه_مهمه صح المعهد شهادته دبلوم لكن الصوج #بدولتنه الخلت الطالب يضحي بأحسن الجامعات والكليات (الهندسه العلوم ---)في سبيل انو يحصله تعين حتى يكون نفسه ويعين اهله ولا نسى انو المعهد الوحيد الينطي لطالب مخصصات ماديه تعينه خلال مدة دراستة /🇮🇶😍🇮🇶

#قبول_المعهد بالنسبة لقبول وعدم القبول  لايستطيع اي طالب  ان يحدده لان القبول غير معلوم لحد الان حسب حاجة الشركات او حسب المعدل 
اذا كان حسب حاجة الشركات فالبصرة تنقبل بمعدلات اقل لان البصرة فيها اكثر من 4000 بئر نفطي كما هو الحال العام البصرة انقبل 79اما اذا حسب المعدل فجميع المحافظات متساويه كما هو الحال في السنه قبل الماضيه حيث قبل ما يقارب 81 ونص لجميع المحافظات (بصرة عمارة ناصريه ) السنة غير معلومة إليك القبول💕🌹
#اي استفسار عن كيفية التقديم او معرفة اي معلومه عن اي قسم راح نكون بخدمتكم 






___________________________________

#اجوبة على مجموعة من الاسئلة للطلاب الجدد الي راح يتم 
طرحها 

ملاحظة مهمه ........

المعهد شنو يقبل هاي السنه تطبيقي او احيائي 
ج/لحد الان غير معلوم هل يقبل أحيائي او تطبيقي ننتظر قرار مجلس الوزارة
نخبركم عن قريب .
___________________________
س/ شوكت التقديم ؟ 

ج  ينفتح بعد نتائج الدور الثاني ب ايام 

____________________________________

س / شلون يتم التقديم ؟ 

ج ،التقديم الكتروني عن طريق الموقع الرسمي للمعهد 

‏http://bsroti.oil.gov.iq/

____________________________________

س/ المعهد بي مسائي ؟ 

ماكو مسائي ويقبل خريجي الفرع العلمي حصراً ،، المتخرج توّه من السادس او ثاني سنه بعد التخرج ، يعني مثلا لو كان اول مرحلة بالكليه وخلصهه ، من حقه السنه الوراهه يقدم عل معهد 

___________________________________

وين صاير المعهد ؟ 

ج ، بالجهورية تسأل يدلوك___________________________________________

س/ شكَد المعدل المطلوب ؟؟

حسب التقديم .احتمال توصل للسبعين او التسعين كله يعتمد على التقديم .
وبسنة 2017 تغيرت الية القبول وصارت لكل محافظة عدد مقاعد محدده بالقبول وبغداد اخذت اعلئ مقاعد

والبنات ينقبلن باقسام محدده ومن ضمنهن اعلى الاقسام 
( يعني اختصاص يمكن للبنت العمل فيه ) 

____________________________________

س / فرضا طلع اسمي وانقبلت شسوي ؟؟ 

ج ، انت سواء طلع اسمك او مطلع تروح تقدم عل انسيابية وتنقبل بكلية وتقدم عليها حسب الاصول وتنطيهم وثيقتك وبعدين من يطلع اسمك بالمعهد تاخذ كتاب ترقين قيد من كليتك وتجيبة للمعهد ويه البطاقه الامتحانية ، ووثيقة تسحبها من الموقع من يطلع اسمك  وتجي للمعهد تقدم اوراقك وتباشر دوام .
و تره التقديم ع المعهد يسموا خاص مو مباشر لتشتبه يعني ماله علاقة بالتعليم العالي انت اتصالك وية وزارة النفط

____________________________________

س/  شنو الاقسام الموجوده ومنو اعلى قسم ؟ 

ج : معهد النفط اربع اقسام وكل قسم يتفرع الى اختصاصات

#قسم النفط : و يشمل كل من :-
                         *- شعبة الانتاج و القياسات الحقلية
                         *- شعبة ميكانيك اجهزة الحفر.
                         *- شعبة الحفر الابار النفطية والغازية
                        .

#قسم التصفية : و يشمل كل من:-
                       
                           *-شعبة التحليلات النفطية
                           *- شعبة التشغيل و السيطرة.
                           *- شعبة تقنية الغاز.
               

#قسم الميكانيك : و يشمل كل من:-
                          *-شعبةالسلامة الصناعية
                          *- شعبة المضخات و التوربينات.
                          *- شعبة ميكانيك المعدات النفطية.
                          *- شعبة اللحام الغازي و الكهربائي.
                          *- شعبة تقنية خطوط الانابيب.
                          
                      
                                                      

#قسم الكهرباء : و يشمل كل من:-
                             *- شعبة كهرباء المعدات النفطية
                             *- شعبة القياس و السيطرة.

____________________________________

* ملاحظه ع الاقسام 👆: كل طالب يفظل الاقسام من حيث واقع حاله يعني اكو اختصاصات خده  بس راتبه مو مثل الاختصاصات المتعبة و الخطره يعني خلهه بالك النفط راتبك ع كد تعبك اوك راح ارتب الاختصاصات حسب رأي غالبية الطلبة  وهذا الترتيب لاتعتبر ترتيب عام بل لكل شخص رغبتة ورأيه في ترتيب الاقسام    : 
1_ التحليلات النفطيه
2-الانتاج 
3_ القياس و السيطره
4-الشغيل والسيطرة 
5_سلامة صناعية
6_كهرباء معدات 
7-تقنية غاز
ارجع وأكد هذا الترتيب ماهو اساسي احتمال شخص معدله 90 ينقبل انتاج اعلى اختصصاص لكن رغبتة يرؤح سلامه كلش عادي يعني تتبع الرغبه ومنا لقبول وضهور الاقسام ان  شاء الله انزل ترتيب مناسب لكل الاختصاصات من حيث سهولة الدراسة وراحة الدوام وان شاء سوف يكون ترتيب مناسب من قبل مهندسين مختصين  

اما بقية الاختصاصات متقاربه فيما بينها تتبع رغبة كل شخص 

* وكل سنة تنفتح اختصاصات و تنسد اختصاصات حسب الحاجة .
____________________________________

س / العشرة الاوائل ؟ 
((#كل_سنه_قرار_جديد_ع_الطلبة_الأوائل_يعني_القرارات_غير_ثابتة))
ج، ماكو شي اسمه العشرة الاوائل ، اكو 10% اوائل ، تفرق ، يعني اذا قسم بي 40 طالب يطلعون 4 بس 

وقبولهم بالكليات حسب الاختصاص مع العلم  ، لازم سنتين تطلع اوائل بالمعهد ، ومن تخلص يخيروك بين التعيين والهندسه 
فرضا اختاريت الهندسة ،

رحلة التفــوق في السـادس, [١٠.٠٨.١٧ ١٧:٠٧]
لازم تطلع خلال اربع سنين من الربع الاول بالكليه ، حتى ترجع تتعين بالنفط ، واذا سنه من السنين مطلعت ينلغي العقد بينك وبين شركة النفط وتبقه عل تعليم العالي حالك حال اي طالب هندسه ،، لذلك محد يرغب للاوائل ، اصلا معدلاتنه تقبل هندسه جان رحنه من البدايه ،، عدا قسم النفط الي يودي هندسه نفط هذا يستاهل التعب ، للولد فقط هذا القسم 
(#هاي_بأنسبة_خلال_الأعوام_السابقة)
اماهذه #السنه_جاء_قرار_جديد وهو(الاوائل ليس لهم عقود بس اول اثنين ع القسم او فقط الاول ع القسم يكملون بريطانيا والبقيه يكملون قناة متميزين بعد ثلاث سنوات)
____________________________________

س / شنو الاقسام الصعبة والسهلة ؟ 

ج ، شباب انتو طلاب سادس وشفتوا معاناة هواي ويه الدراسة ، هنا يتغير مصطلح الصعب والسهل عن مفهومكم ،،،  يعني اصعب الاقسام القياس والسيطرة والي كل الطلاب تخاف منه ، تحتاج ثلاث ساعات يوميآ تطلع اوائل 👍

____________________________________

س / الاقسام الداخلية ؟ 

المعهد لا يوجد فيه أقسام ماعليك اله اتأجر والمعهد يكفل المصاريف الي قدرها 150الف

____________________________________

س / شكد المخصصات ؟ 

75 الف  , وتنقص الفين ونص بكل يوم تغيب عن الدوام 


طلاب معهد الناصريه والعمارة  ؟؟

حبايبي ينطوكم شهريا بدل سكن 150 الف و احسلك اتاجر شقه تنطي 90 بالشهر و 60 ظيفهن ع المنحه الحمد لله 😂

____________________________________

س / التعيين مركزي ؟

اذا انت تريد تعيين ، ف حتلو مو مركزي واحتمال يتاخر شويه بس اول وتالي اول شخص يتعين بالعراق هو خريج معهد النفط 

بس يجوز يتاخر خصوصا ويه هاي الازمة الاقتصادية و التقشف لكن يبقة خريج النفط الاوفر حظا بين اقرانه 
من خريجي الكليات من حيث التعيين ..
____________________________________
____________________________________

س / واهم سؤال عدكم ، شگد الراتب اول ما اتعين ؟ 

اول متتعين يحسبولك خبره ثلاث سنين مال الدوام بالمعهد فراتبك يبدي ب 950 الى 1.200 حسب اختصاصك .

____________________________________

س/ شهادة المعهد ؟ 

ج ، عزيزي قابل ينطوك ماجستير  هو دبلوم سنتين  بس بالتعيين شهادتك تعادل تلث سنين دراسة  على اعتبار مداوم بالعطله تدريب ميداني ( مو وكته تعال داوم و تعرف شنو تدريب ) 

____________________________________

س / شيصيحولي من اتعين ؟ 

ج ،اكيد  دكتور لو مهندس اقدم !! 😂
شيصيحولك اكيد عامل واذا كلش تجمل تصير عامل فني🐸 ^^ 

____________________________________

س / وين نتعين ؟؟

ج ، اذا قسمك نفط  ، فتتعين بالبصره او بالعمارة حسب الموقع النفطي ، عداهه تتعين بمحافضتك وبالاكثر اداري 

____________________________________






بنسبه جماعه البصرة 
لسنه لفاتت معدلات لاقسام كانت 
الانتاج 89
اختصاص تحليلات نفطيه 88
اختصاص القياس والسيطرة 86
واختصاص  السلامه 84
واختصاص معدات الكهرباء 83 
واختصاص معدات نفطيه 81
واختصاص الحفر 79 
واختصاص لحام 78
بقيه لاقسام ما عندي علم عليها بس كانت قبولات معدلاتهم بين 82 و 85
هايه بنسبه سكنه لبصرة
بنسبه لعمارة كانت معدل اقل شي قبلت هو 83 نقبل لحام 
ولناصريه معدل اقل شي قبل هو 85 نقبل لحام ولبصرة اقل معدل قبل 78 ونقبل لحام 
يعني محافظة عن محافظة يختلف حسب شركات وكانت بصره معدلاتها قليله بسبب كثرة شركات و اعداد البر بيها ..
وشغله لاخرة تعتمد ع رغبه طالب
اكو معدلاتهم عاليه وراح قسم معدله ناصي حسب رغبه طالب

#نقطة_مهمه_وهو_اكثر_سؤال_جاي_ينسأل ؟
⛧المعهد شنو يقبل السنة احيائي امتطبيقي⛧
شباب هسه حاليا بأختصار المعهد تقديمة مباشر وان شاء الله يقبل الفرعين الأحيائي والتطبيقي لكن راح يكون هنالك فرق في الاختصاصات يعني بعض الاختصاصات تقبل الاحيائي والبعض الاخر تقبل التطبيقي هذا القرار حاليا الموجود بالمعهد ونقلا عن العمادة لكن ننتظر القرار الرسمي الي راح تقره وزارة النفط او الصفحة الرسمية للمعهد او السيد المدير راح يقره ع صفحة الشخصية هذا القرار راح يكون بشهر التاسع
غير هذا الكلام ماله اَي صح بعد #ونقلاً_عن_ادارة_المعهد

هسه هذا شرح الاخوة الممثلية بالمعهد 
رحلة التفـــــوق في الســـــــادس 








وضع القراءة :
حجم الخط
+
16
-
تباعد السطور
+
2
-