كل ما يخص التقديم للدراسة المسائية للمعهد التقني الطبي بعقوبة لسنة 2017-2018

كل ما يخص التقديم للدراسة المسائية للمعهد التقني الطبي بعقوبة لسنة 2017-2018




كل ما يخص التقديم للدراسة المسائية للمعهد التقني الطبي بعقوبة لسنة 2017-2018 :

لمن اني قدمت رحت ٤ مرات تقريبا لان مجنت اعرف اشلون يقدمون وشنو الاجراءات هسة راح اوضحة بالتفصيل حتى اتروح ٢ مرة متسويهن ٣ 😊 

#اولا : موقع المعهد قرب ملعب ديالى في بعقوبة - مجاور البانزين خانة 😌

#ثانيا : معدلك اقل شيء 70% يلا يحق لك تقدم .

#ثالثا : تجي للمعهد وجايب وياك فقط ( الجنسية + البطاقة التمونية + درجاتك مال السادس) تاخذ منهن معلومات فقط
تنطي 20 الف كما موضح بالصورة رقم (1) ،
حتى ينطوك وصل انك دفعت 20 الف
وينطوك استمارة تمليهة بالبيت كما في الصورة رقم (2)
بعدها تروح للمكتبة في المعهد تلكي احد الموضفين ودكعدون انت ويا وتملون الاستمارة مجانا ، الاستمارة في الصورة رقم (3) 
راح يرسلون الاستمارة في الانترنيت
وراح يسحبولك نسخة وينطوكياهة 😊
راح تطلع من المعهد وانت عندك شغلتين (وصل + استمارة بيهة درجاتك الي سحبتهة بالمكتبة مال المعهد)

#رابعا : اتروح للمدرسة اتوديلهم الاستمارة الي نطوكياهة بالمعهد وتصدق الدرجات يعني يختمون عليهن ويوقعون
منو يكول هذني درجاتك .
اذا انت طالب سادس تاخذ الوثيقة من المدرسة والبطاقة المدرسية ضمهة عندك ميحتاجهة المعهد واذا الوثيقة بعدهة مجاية للمدرسة ماكو مشكلة بعدين جيبهة
اذا خريج كلية صدق الدرجات وتعال ، الوثيقة بعدين سلمهة لمن اداوم حتى لو بشهر ١ 😊

#خامسا : حاليا عندك
١. وصل 
٢. استمارة مصدقة
٣. وثيقة ( اذا كانت موتوفرة لديك )
٤. استمارة اخرى انت مليتهة بالبيت
تروح للمعهد وتجيب وياك استنساخات :
١. الجنسية
٢. شهادة الجنسية 
٣. بطاقة السكن 
٤. جنسية الاب
٥. صور عدد ٤ 
٦. كفيل يعني هوية اي واحد موظف بالدولة 
راح ينطوك فايل بي معلومات مكتوبة على الفايل
وينطوك قلم وتكعد ع المسطبة وتملي المعلومات تاخذهن من المستمسكات الي انت جايبهن 👆
بعدين اتروح مكتبة مال استنساخ بصف التسجيل تاخذ ( تعهد ) ب ١٠٠٠ دينار
وبعدين اتروح للشباج مال التسجيل
ياخذون الفايل مالتك ويكبسون 👆👆 الحبشكلات الفوك مالتك ( الجنسية ...... الخ )
اذا كان عندك نقص ماكو اي مشكلة 
لمن اداوم راح يدزون عليكم واحد واحد 
انريد فلان ابن فلان عندة نقص هوية كفيل
فلان ابن افلان نقص تعهد ... الخ

#سادسا : لمن ينتهي التسجيل الي بعد شهرين تقريبا من الافتتاح
راح تنزل قوائم ع صفحة المعهد التقني بعقوبة
بالترتيب من اعلى معدل الى اقل معدل
من معدل ٩٣ تقريبا الى ٧٠ 
شكو واحد مسجل راح ينزل اسمة وراح يكتبون
اعلان : الي يريد يكمل بالتسجيل خل يجي يدفع القسط 
واكو راح اتشوفون كدام اسامي البعض مكتوب واصل
هذولة دافعين قسط لمن جوي للمعهد بالنقطة الخامسة
العام بهاي القوائم تسلسلي كان رقم ٢١٠ تقريبا 

#سابعا : القسط الصورة رقم (4)
المعهد التقني بعقوبة متعاقد وية مصرف العقاري حصرا
هذا المصرف صاير قريب ع المعهد
قرب مديرية تربية ديالى مجاور مدرسة القادة
اتروح الى هناك وتنطيهم مبلغ
2,320,000 اذا اتريد بعدين بالمعهد لمن تنقبل تحليلات تنطيهم الباقي بالمعهد
او تنطي القسط كامل 2,570,000 
وينطوك صك اتعنونة الى المعهد التقني بعقوبة
ويكون بأسم الطالب الي يريد يقدم
وتنستنسخة ٢ نسخة ملون قبل لا اتسلمة للمعهد
حتى خاف اتصير اشكالات انك عندك نسخة موجودة يمك
وتنطي الاصلي والمستنسخ للمعهد
وتكدر اتسلمة وية النقطة الخامسة

#ثامنا : بعد ٢ اسبوع تقريبا
راح تطلع الاسماء للطلبة على صفحة المعهد التقني بعقوبة
من اعلى معدل الى اقل معدل
اسماء طلاب كلهم دافعين قسط
مقابل اسمهم مكتوب واصل والقسم (تحليلات ، تمريض)
اسمي العام تقريبا تسلسل ١٤٠ كان بعد ما كان تسلسل ٢١٠ 
لان اكو بيهم بس يقدمون ميكمل التقديم
لو يقدم با اكثر من مكان ويختار المكان المناسب
المهم اخذ للتحليلات ١٧٠ طالب 
الطالب رقم ١٧٠ كان معدلة ٧٤.٤
والتمريض اخير شيء ٧٠.٤
وكان الله يحب المحسنين 
___
ملاحظات :

١. الاستمارة الي بالانترنيت تكدر تسحبهة بيتكم اذا كان عندك طابعة عن طريق موقع الجامعة التقنية الوسطى بس لازم عندك الوصل ابو ٢٠ الف لان بي رقم ولازم اتكتبة بالاستمارة 

٢. راح يكلولك ادفع قسط حتى تحجز مقعد
ماكو هيج سالفة لا مقعد ولا بطيخ 
براحتك اتريد ادفعة بالبداية وية النقطة الخامسة
او ادفعة لمن ايصيحولك بالنقطة السادسة 😌

٣. التقديم يوم الاحد المقبل 27/8/2017 اتقدم اول واحد اخير واحد نفس الشيء يرتبوك من اعلى معدل الى اقل معدل
سلاحك هو معدلك

٤. الدوام للمسائي
هو السبت من ٨:٣٠ صباحا الى ٣:٣٠ او ٤:٠٠ عصرا
الاحد الى الاربعاء من ١:٠٠ ظهرا الى ٤:٠٠ عصرا
الخميس و الجمعة عطلة 

٥. بالنسبة للطلاب الجدد (تطبيقي واحيائي) بالنسبة للمعهد الطبي لحد الان ما عدنة معلومات هل راح يقبلهم اثنينهم لو بس الاحيائي ، بس تتوفر المعلومات راح انعدل المنشور 😊
وربنا يوفقنا جميعا ان شاء الله 😌😊

٦. قسم صحة مجتمع غير موجود للمسائي 😌 

الطالب حيدر مجيد

#الامير



وضع القراءة :
حجم الخط
+
16
-
تباعد السطور
+
2
-